ÖZÜ DƏ DƏNİZ KİMİ ADAM...

Qnun haqqında saatlarla, günlərlə danışmaq, yazmaq olar. Əziz oxucum, bu yazını sadə bir jurnalistin tanınmış bir vəzifəli şəxs barədə iltifatı, mədhiyyəsi, təmənnalı münasibəti kimi yox, uzun illər müşahidələrinin nəticəsi olan səmimi bir yazı kimi qəbul etməyinizi rica edirəm. O, zəngin təfəkkürünün məntiqiliyi, natiqliyi, əməldə fəzilətçilik və xeyirxahlığı, fəaliyyətdə mübarizliyi və tükənməz səbri sayəsində həm öz peşəsini, həm də insanlıq zirvəsini fəth edib. Bu zirvə yalnız müdriklik səlahiyyəti verilən insanlara nəsib ola bilər. O, bir çoxunun dərdinə dərman, ürəyinə təpər, işinə yarayan, insanın düşüncəsinin aydınlığını, şəffaflığını, saflığını sevən ziyalımızdır. Belə adamlarla ünsiyyətdə olanda onun münasibətini üzünün zəif, təlatümsüz təbəssümündən sezmək olur. O, heç kəsə ağır söz deməz, yaraya köz basmaz. O, yaxşı bilir ki, tikanlı söz qəlbi qırır, sındırır, insanın ruhi-aləmini zədələyir.

Söhbət “Azərbaycan Xəzər Dəniz Gəmiçiliyi” QSC sədrinin 1-ci müavininin müşaviri Daməd İmanovdan gedir. O Daməd İmanovdan ki, sözünün qədir-qiymətini bilir. O Daməd İmanovdan ki, sözü zərgər dəqiqliyi ilə seçir və onu hədəfə vurur. O Daməd İmanovdan ki, sözünün ağasıdır. O Daməd İmanovdan ki, sözü ilə əməli həmişə üst-üstə düşür. İllər keçdikcə, zaman dəyişdikcə, hamı zamana uyğun hərəkət etməyə çalışır. O isə dəyişməzdir. Ona görə də Daməd müəllim daim qərarlı, sakit, iradəli, səriştəli və seçmək qabiliyyətinə malik, seçdiyini sevən, ona vurulan, ona tapınan bir adamdır, adamlar adamı...

QISA TANIŞLIQ

Daməd İmanov 1959-cu il aprelin 15-də Füzuli rayonunun Horadiz kəndində dünyaya gəlib. 1976-cı ildə Bakı Politexnik texnikumunun qiyabi şöbəsinə qəbul olub. 1979-cu ildə hərbi xidmətini bitirdikdən sonra Xəzər Dəniz Neft Donanmasında matros köməkçisi kimi işə başlayıb. Daha sonra elə həmin idarədə II dərəcəli matros, I dərəcəli matros və baş matros-bosman vəzifələrində çalışıb. 1986-cı ildə Qafur Məmmədov adına Bakı Dəniz Yolları Məktəbinin gəmi sürücülüyü fakültəsini bitirərək kapitanın III köməkçisi vəzifəsinə təyin edilib. Az sonra kapitanın II köməkçisi və baş köməkçisi olub. 1988-ci ildə gəmi kapitanı vəzifəsində çalışmağa başlayıb. 1996-cı ildə XDND-də şöbə rəisi vəzifəsinə təyin edilib. 1999-cu ildə Mahaçqala şəhərində İdarəetmə və Biznes İnstitutunu bitirib. Bundan sonra yenidən kapitan vəzifəsinə qayıdıb. 2006-cı ildə Azərbaycan Dövlət Dəniz Akademiyasının “Gəmiçilik və gəmilərin hərəkətinin idarə edilməsi” fakültəsinə qəbul olub, 2010-cu ildə oranı bitirib.

2007-ci ildən 2014-cü ilə kimi Azərbaycan Respublikası Dövlət Neft Şirkətinin Xəzər Dəniz Neft Donanmasının Abşeron rayon Dəniz Neft Donanma İdarəsinin rəisi vəzifəsində işləyib. 2014-cü ildə “Azərbaycan Xəzər Dəniz Gəmiçiliyi” QSC-nin Təhlükəsiz üzmə departamentinin rəis müavini, 2016-cı ildə isə Xəzər Dəniz Neft Donanması rəisinin birinci müavini vəzifəsinə təyin olunub. 2017-ci ilin yanvarından “Azərbaycan Xəzər Dəniz Gəmiçiliyi” QSC sədrinin 1-ci müavininin müşaviridir.

Daməd İmanov Xəzər Dəniz Neft Donanmasına aid bütün növ gəmilərdə işləyib. Dənizin gözəlliklərini də dadıb, fırtınasına da düşüb.
O deyir ki, yaxşı dənizçi olmaq elə də çətin deyil. Bunun üçün insan özünü daim inkişaf etdirməli, gəmiçilik sahəsində baş verən yenilikləri izləməlidir. Həmçinin, daim mütaliə etmək dənizçinin özünə inamını artırır, iradəsini möhkəmləndirir. Və bu da ona uğur gətirir. Bundan başqa, o hesab edir ki, bu sahədə çalışan hər kəs məsuliyyətli olmalı, vəzifəsini vicdanla yerinə yetirməlidir.

Daməd İmanov işlədiyi vaxt ərzində kollektiv arasında böyük hörmət və rəğbət qazanıb. Ən əsası, onun zəhmətkeşliyi hədər getməyib,çəkdiyi əziyyətlərin bəhrəsini görüb. O, 20-dən artıq fəxri diploma layiq görülüb.

2010-cu ildə Azərbaycan Kütləvi İnformasiya Vasitələri İşçiləri Həmkarlar İttifaqı Rəyasət Heyətinin qərarı ilə “İnam şərəf” diplomuna, 2011-ci ildə H.Z.Tağıyev adına Xeyriyyə Cəmiyyətinin Sərəncamı ilə diplom və ordenə, 2013-cü ildə “Azərbaycan Dünyası” beynəlxalq jurnal və Dədə Qorqud Ali Şurasının qərarıyla “Qızıl Ürək” ordeninə layiq görülüb.

2016-cı il 25 iyunda səmərəli əmək fəaliyyətinə görə və “Dənizçi Günü” peşə bayramı münasibətilə “Donanmanın Fəxri işçisi” döş nişanı ilə təltif edilib. 2017-ci il 23 iyunda Azərbaycan Respublikası Prezidentinin Sərəncamı ilə Azərbaycanda dəniz nəqliyyatının inkişafında xidmətlərinə görə “Tərəqqi” medalına layiq görülüb. 2018-ci il 20 oktyabrda Azərbaycan Respublikası Prezidentinin Sərəncamı ilə Azərbaycan Xəzər Dəniz Gəmiçiliyinin 160 illik yubileyi münasibətilə “Gəmiçilik sahəsində xidmətlərə görə” medalı ilə mükafatlandırılıb.

Bəli, Daməd müəllim hadisələri saf-çürük etməyi, onun səbəblərini aşkara çıxarmağı, çevik hərəkətlə ona cavab verməyi bacaran məmurdur. Bu çeviklik ona cəsarət, güc, şərəf verir. Həqiqətən Daməd İmanov sadə, təbii bir insandır. O da var ki, onun haqqında yazmaq, danışmaq çətindən də çətindir. Cünki Daməd müəllim haqqında deməyə söz həddən artıq çoxdur. Onun şəxsiyyəti haqqında o qədər faktlar var ki, insan bilmir hansını desin, hansını yazsın. O, xeyirxahlığı, prinsipiallığı və mərhəmətliliyi özündə təcəssüm etdirən nurlu bir simadır. Onun zəkası, istedadı, həyat tərzi, dünyaya və özünə münasibəti, sözün həqiqi mənasında cöxlarına örnək ola bilər.

...Burada bir haşiyə çıxmaq istəyirəm. Dahi şairimiz Nizami Gəncəvinin “Xeyir və Şər” mənzum hekayəsindəki ibrətamiz faktlar diqqəti daha çox cəlb edir. Onun “Yeddi gözəl” poemasında Cin şahzadəsinin söylədiyi bu hekayətdə xeyirlə şərin mübarizəsi əks etdirilir. Əsərdə Xeyir, kürd və kürdün qızı xeyirxah qüvvələr, xeyirxahlığı təmsil edən surətlərdir. Şər isə burada pisliyi, mənfiliyi əks etdirir.

Susuz səhrada Xeyir bir içim su üçün Şərə yalvarır, ona qiymətli ləl təklif edir. Lakin Şər öz adı kimi iş görərək nəinki Xeyirə su vermir, əksinə, gözlərini də çıxararaq onu tək-tənha qoyub gedir. Xeyiri bir kürd qızı xilas edir. Gözlərini isə qızın atası sağaldır. Xeyir bunların yanında qalaraq bir ailə kimi yaşayır. Kürd ona öz doğma övladı kimi münasibət göstərir, qızını da Xeyirə verərək bütün var-dövlətini onun sərəncamına verir. Xeyir, kürd və kürd qızı arasında olan münasibətlər təmənnasız olub, əsl xeyirxahlıq nümunələridir. Onların hər birinin xeyirxahlığı cavabsız qalmayıb, digəri tərəfindən yüksək qiymətləndirilir.

Xeyirin yaxşı işləri bununla bitmir. O, öz ölkəsinə qayıdarkən adına uyğun hərəkət edərək xəstə şah qızını sağaldır, heç bir təmənna güdmür. Ona var-dövlət təklif edən şaha Xeyir belə söyləyir:

Heç şeydə yox gözüm qoca dünyada,
Mənim verəcəyim dərman-dava da
Allah rizasına veriləcəkdir.

Mənfur Şərin isə əsərdə aqibəti öz xasiyyətinə uyğun olur, onun xəyanət üzərində qurulan səadəti heçə dönür, puç olur.

Hekayə şərin, zülmün uzun sürməyəcəyinə, xəyanətkar adamın gec-tez cəzaya çatacağına oxucunu inandırır. İnsan səadətinə yüksək qiymət verən şair xoşbəxtliyin qədrini bilməyi, insanlara bir-birinə arxa, dayaq olmağı, həyatı gözəlliklər və dünya nemətlərindən birlikdə faydalanmağı tövsiyə edir.

Hekayədə bir daha təsdiq olunur ki, xeyirxahlıq, yaxşılıq, düzlük, ədalət zərbələrə məruz qala bilər, əzilə bilər, lakin heç vaxt məhv edilə bilməz. Vicdanı pak, nəfsi təmiz olan insanlar heç vaxt xeyiri məhv etməyə qoymazlar. Bəşəriyyət həmişə insanlığa bəla kəsilmiş şərə qarşı mübarizə aparmalı, xeyirxahlığı, ədaləti yaşatmalı, şəri, zülmü məhv etməlidir.

Həmişə bu məsəli çəkəndə istər-istəməz Daməd İmanovun həyatda etdiyi saysız-hesabsız yaxşılığı yada düşür. Xalqımızın ən gözəl xüsusiyyətlərindən olan insana yaxşılıq etmək, qayğı göstərmək Daməd müəllimin əqidə manifestidir. Onun yaxşılıq etdiyi insanların sayını müəyyənləşdirmək çox çətindir. O, insanlara qayğı göstərir, onların işinə yarayır. Bu, onun həyatını mənalandırır, dəyərini, qiymətini yüksəldir. Daməd İmanov sözün həqiqi mənasında, bir çox insan üçün ümid və inam yeridir.

Bəli, Daməd İmanov kimi adamlar elədikləri yaxşılıqlarda, başlarını sığalladıqları yetimlərin dualarında, qollarından tutub qaldırdıqları kimsəsizlərin ruhlarında yaşayıblar, yaşayırlar… Daməd müəllim də bax beləcə ömür sürən ziyalı- məmurlarımızdandır. O, hədisiz dərəcədə sadə, alicənab, təvazökar insandır.

Tarixdə nə baş verirsə, onu insan edir. İnsanın yaratdığı böyük dəyərlərə qiymət verərkən biz tarixdən kənara çıxırıq. K.Yaspers yazırdı: “Biz insanı özünün yaratdığı nəhəng əməllərdə görərkən tarixin sərhədini keçirik; bu əməllərlə insan varlığı tapıb başa düşür və onu başqaları üçün də əlçatan edir”. Daməd İmanovun həyatinın, fəaliyyətinin özəyini məhz bu ali məqam əhatə edir.

Daməd İmanov bütün zamanlarda öz ləyaqətini, izzəti-nəfsini qoruyub saxlaya bilib. Görkəmli Azərbaycan alimi Nəsrəddin Tusinin belə bir fikrini yada salmaq çox vacibdir: “Başqasına etdiyin yaxşılığı unuda bilərsən, ancaq sənə edilən yaxşılığı unutmamalısan”. Bu fikir həmişə mənim qəlbimdə yaşayır. Ona görə də Daməd İmanovun etdiyi yaxşılıqları, qayğıkeş əməlləri, xeyirxah və inamlı işləri onu insanların qəlbində daim ucaldır, zirvələrə qaldırır. Onun insanlara qarşı həmişə səmimi, xeyirxah və qayğıkeş olması bizim üçün əbədi bir örnəkdir.

Daməd İmanov işində həddən artıq tələbkardır. O, biganəliyi xoşlamır. Elinin-obasının qədrini biləndir, xalqa xidməti həyatının məna və məqsədi hesab edir. Daməd müəllim saf əqidəsi və məsləki olan insandır. Onun əqidəsi həmişə humanizmə, həqiqətə, ədalətə söykənib. O öz müdrikliyi, zəkası, dünyanı dərketmə qabiliyyəti ilə həmkarlarından fərqlənən məmurdur, xalq adamıdır, ən əsası vətəndaş-ziyalıdır.

Antik dövr filosofu Epikürün şagirdlərindən onları müəllimə bağlayan nədir, – sualına şagirdləri belə cavab veriblər: “Bizi Epikürə bağlayan onun həmişə özü-özünə bərabər olmasıdır”. Bu epitet tamamilə Daməd İmanova aiddir: o həmişə özü-özünə bərabərdir, təkrarsızdır – həmişə Daməd İmanovdur! Daməd müəllim həmçinin insanlığı, şəxsiyyəti, səmimiyyəti uca tutub qiymətləndirən, onu qorumağı bacaran şəxsiyyətdir. O, adamlar arasında özünün xoş olduğu ən ülvü keyfiyyətləri ilə seçilən-sayılan nüfuz sahibidir. Təbiətən sakit, mülayim, həddən artıq nəvazişli və qayğıkeşdir.

Sokratdan soruşardılar: “İnsanda ən çox nəyi qiymətləndirirsən?” Filosof tərəddüd etmədən “İnsaniyyəti, insana layiq keyfiyyətləri”- deyə cavab verərdi. Hər bir insan üçün insaniyyətə tam sahib olmaq ən böyük şərəfdir. Məhz Daməd müəllimlə təmasda olarkən həmişə onun söz-söhbətlərindən, davranışından, özünə münasibətdə belə bir fikir nur kimi ətrafa yayılır: “İnsanlar, adam olun, bu Sizin birinci vəzifənizdir!”. Daməd müəllimin anlatmaq istədiyi saf əqidə və məslək məhz budur!

Bəli, Daməd İmanov rahat həyat sürmək üçün kiməsə, nəyəsə əyilən deyil. Həm də var-dövlət toplamaq üçün. Cünki Daməd müəllimin həm maddi, həm də mənəvi xəzinəsi bir çox həmkarlarından üstündür. O, sözdə, əməldə, davranışda, düşüncədə, fikirlərdə əsl ziyalı - məmur olmagı nümayiş etdirir. O, bu zirvədə uca, əzəmətli, qədd-qamətlidir! Və bu qamət, bu vüqar, bu əzəmət ona həmişə yaraşıb, yaraşır və yaraşacaqdır...

***

“Azərbaycan Xəzər Dəniz Gəmiçiliyi” QSC sədrinin 1-ci müavininin müşaviri Daməd İmanovun daha bir yaxşı keyfiyyəti isə jurnalistlərin də ürəyini fəth edə bilməsidir. Heç zaman onlardan "qaçmır". Onların istənilən məsələ ilə bağlı suallarını cavablandırmağa çalışır. Həm də dəqiqliyi, obyektivliyi, qərəzsizliyi çox sevir və hamıya da bunu tövsiyə edir. Deyir ki, ağa ağ, qaraya qara demək lazımdı. Yalan məlumatlar cəmiyyətə, insanlara zərər gətirər.

Bilmirəm, onun məmur-ziyalı kimi portretini az da olsa cıza bildimmi? O, həqiqətən sadə, səmimi, alicənab adamdır. Belə adamlar haqqında yazmaq həqiqətən cətindir. O, sözün həqiqi mənasında cıraq kimi adamdır.

Allah təaladan istəyimiz odur ki, Daməd İmanov kimi insanları pənahında saxlasın. Bizim xalqın, Vətənimizin belə qeyrətli, dəyanətli, mərd insanlara ehtiyacı var. Tanrı Sizi qorusun, Daməd müəllim! Tanrı millətimizi qorusun! Amin!!!

Sadiq YOLCU.

Qaynarxeber.az

Tarix: Bu gün, 09:52 Oxunub: 27

Bölməyə aid digər xəbərlər

16-09-2024, 14:04 Moskvada ad-san qazanan stomatoloq-cərrah Ceyhun Cəfərov

14-02-2023, 15:19 Bəhruz Şirəliyev: "Azərbaycan xalqı hər vaxt qardaş Türkiyənin yanındadır"

26-01-2021, 13:02 Gəncədə xaraba günə qalan Rəsulzadə parkı... - FOTO

8-09-2020, 16:16 Valeh Mamedov: "Ulu öndər Heydər Əliyevin dövlət, millət qarşısındakı xidmətləri zaman keçdikcə daha aydın görünür"

8-09-2020, 15:58 Rövşən Əliyev: " Erməni təxribatı bir daha iflasa uğradı"

27-07-2020, 23:21 İlham Əliyev yeni təhsil nazirini qəbul etdi - YENİLƏNİB + FOTO/VİDEO

27-07-2020, 08:14 Elin Süleymanov ABŞ-dakı soydaşlarımıza erməni təxribatı ilə bağlı müraciət etdi

26-07-2020, 17:01 Çörəyi şərəfini satmaqla əldə edənlər